Saqqummersitami matumani inuusuttut suliffeqarnermut aammalu ilinniarnernut atassuteqarnerat nassuiarneqarpoq.

 

Najoqqutat aammalu kisitsisitigut paasissutissat nalunaarsuutit

Kisitsisitigut paasissutissani suliarineqartuni matumani nalunaarsuiffiit atorneqartut tassaapput:

 

• Naatsorsueqqissaartarfiup innuttaasunut nalunaarsuiffia (1. januaari aallarnerfigalugu)
• Ilinniartitaanermut Naalakkersuisoqarfiup aammalu Oqaatsinik Pikkorissarfiup Kalaallit Nunaanni Qallunaat Nunaannilu efterskoleni atuartunik nalunaarsuiffii
• Ilinniagaqarnersiuteqartitsiviup (USF-ip) nalunaarsuiffia
• Naatsorsueqqissaartarfiup suliffilinnut nalunaarsuiffia
• Naatsorsueqqissaartarfiup ilinniakkanut naammassineqarsimasunut qaffasinnerpaanut nalunaarsuiffia

 

Qulaani paasissutissanik ataatsimoortitsinermi innuttaasunut ataasiakkaanut kisitsisitigut paasissutissanut nalunaarsuiffimmik pilersitsisoqarpoq ukiup naalernerani paasissutissanik ataani pineqartunik imaqartumik:

 

·         Ukiut aamma suiaassuseq

·         Najugaqavissuunermik nalunaaqutsiineq

·         Najugaq aammalu pineqartup ukiumi 12-inik ukioqalerfiani ukiup naanerani najugarisaa

·         Ilinniakkamik ingerlatsineq imaluunniit suliffeqarneq

·         Ilinniagaq naammassineqarsimasoq qaffasinnerpaaq

 

Misissukkat amerlassusaat aammalu najugaqavissut

Ukiumi kisitsiviusumi naatsorsuutini pineqarput ukiup naalernerani 16-it 25-illu akornanni ukiullit aammalu tunngavilersuutinik ataani taaneqartunik naammassinnissimasut:

 

1.      Ukiup aallartinnerani naaneranilu Kalaallit Nunaanni inunnik nalunaarsuiffimmi (najugaqavissutut) allassimaneq

2.      Ukiup naalernerani Kalaallit Nunaanni inunnut nalunaarsuiffimmi allassimaneq aammalu ukiup kisitsiviusup ingerlanerani Kalaallit Nunaata avataani efterskolemik ilinniakkamilluunniit ingerlatsisimalluni naammassinnissimaneq imaluunniit unitsitsisimaneq

3.      Ukiup naalernerani Kalaallit Nunaanni inunnut nalunaarsuiffimmi allassimaneq ilinniakkamillu ingerlatsisutut nalunaarsorsimaneq , ukiullu naalernerani Kalaallit Nunaanni ilinniarfimmik naammassinnissimannginneq imaluunniit ukiup ingerlanerani Kalaallit Nunaata avataani efterskolemik ilinniakkamilluunniit ingerlatamik unitsitsisimaneq

4.      Ukiup naalernerani Kalaallit Nunaanni inunnut nalunaarsuiffimmi allassimannginneq kisiannili ukiumi kisitsiviusumi qaammat decembarimi Kalaallit Nunaata avataani efterskolemik ilinniakkamilluunniit meeqqat atuarfiannit qaffasinnerusumik ingerlataqartutut nalunaarsorsimaneq

 

Misissukkat amerlassusaat amerlassutsinut marlunnut avillugit immikkoortinneqarput.

 

Amerlassutsini immikkoortuni siulleq Kalaallit Nunaanni nunaqavissunik imaqarpoq, ukiup kisitsiviusup aallartinnerani naaneranilu Kalaallit Nunaanni najugaqartutut nalunaarsorsimanerat (piumasaqaat 1.-imik qulaani allassimasumik naammassinnissimasut) tunngavigalugu nunaqavissutut taaneqartunik.

Amerlassutsini immikkoortut aappaat Kalaallit Nunaanni avataanilu ilinniakkanik ingerlatsisunik aammalu ukiup naanerani Kalaallit Nunaata avataani efterskolemik imaluunniit ilinniakkamik unitsitsisimallutik naammassinnissimallutilluunniit angerlamut utersimasunik imaqarpoq (qulaani piumasaqaatinik 2, 3 imaluunniit 4-mik naammassinnissimasut).

 

Ukioq atuarfiusoq 2010/2011 sioqqullugu qallunaat efterskoliini naammassinnissimasunut unitsitsisimasunullu nalunaarsuuteqanngilaq. Tapiissutinik aningaasaliiffigineqarsimasut kisimik takuneqarsinnaavoq. Taamaattumik misissukkat tamakkerlutik amerlassusaannut nalunaarsuutit nunaqavissunut nalunaarsuutit nalunaarsorneqarneranniit ukioq ataaseq qaangiummat aatsaat aallartipput.

 

Najugaq

Najukkanut paasissutissani inunnik nalunaarsuisarfimmi najugaq aallaavigineqarpoq. Ilinniarfinni Kalaallit Nunaanniittuni nalunaarsorsimasut inunnullu nalunaarsuisarfimmi nalunaarsorsimanngitsut ukiup kisitsiviusup tulliani najugaat atorneqarput. Aammattaaq ukiumi qaangiuttumi qaninnermi najugaq nalunaarsorneqarsimasoq atorneqarpoq. Ilinniakkanik ingerlatsisut ataasiakkaat Naatsorsueqqissaartarfiup inunnut nalunaarsuisarfiani allassimanngillat, taakkununnga ilinniarfiup adressia atorneqarpoq.

 

Nunani allani ilinniarfinni nalunaarsorsimasut nunami allami najugaqartutut taaneqarput, kalaallit inunnut nalunaarsuisarfianni nalunaarsorsimanerat apeqqutaatinnagu.

 

Ukiuni pineqartuni najugarisap atuutsinneqartup saniatigut aammalu ukiumi 12-inik ukioqalerfiup naanerani najugarisimasaq nalunaarsorneqarpoq. 12-inik ukioqarlutik inuit nalunaarsuiffianni nalunaarsorneqarsimanngitsut Kalaallit Nunaata avataani najugaqartutut nalunaarsorneqarput.

 

Ivittuuni najugallit Nuummi najugalittut nalunaarsorneqarput.

 

Kommunit agguaannerisa avataanni najugallit misissukkat amerlassusaannut ilaanngillat.

 

Ilinniakkamik ingerlatsisut imaluunniit suliffillit

Inuusuttut ukiumi kisitsiviusumi qaammat decembarimi ilinniartutut suliffeqartutulluunniit imaluunniit ilinniagaqanngitsutut suliffeqanngitsutullu nalunaarsorneqarput. Nalunaarsuinerillu pingaarnersiorneqarput, ilinniakkamik ingerlatsisoq suliffeqartorlu taamaallaat ilinniakkamik ingerlataqartutut taaneqarluni.

 

Efterskolinik ilinniakkanillu ingerlatsisut tassaapput Naatsorseqqissaartarfiup ilinniartitaanermut nalunaarsuiffiani nalunaarsorsimasut. Efterskolernerit eqqaassanngikkaanni ingerlatsinerit inuusuttunut qaffassarluni ilinniarfinninngaanniik qummullu qaffasissusillit taamaallaat nalunaarsorneqarput (ISCED-ni qaffasissuseq 3 qummullu).

 

Inuusuttut ilinniakkanik ingerlatsinatillu suliffeqanngitsut inuusuttunik sullinniakkanik taaneqarput. Inuusuttut sullinniakkat tassaapput inuusuttut suliffeqanngitsut aammalu inuusuttut suliffissarsiunngitsut. Inuusuttunut sullinniakkanut ilaasinnaapput 16-inik ukioqalereersimallutik meeqqat atuarfiannik naammassinnissimasut aammalu pikkorissarluni ilinniarnernik ingerlatsisut, assersuutigalugu Majoriami (ISCED-ni qaffasissuseq 2). Taamatuttaaq inuusuttuni sullinniakkani ilaasinnaapput ilinniakkanik ingerlatsisut kisiannili Ilinniagaqarnersiuteqartitsivimmi nalunaarsorneqarsimanngitsut.

 

Ilinniagaq naammassineqarsimasoq qaffasinnerpaaq

Inuusuttunut misissukkani ilaasunut tamanut ukiup kisitsiviusup pineqartup naanerani ilinniagaq naammassisimasaq qaffasinnerpaaq nalunaarsorneqarpoq. Piginnaanngorsarluni ilinniarfiit saniatigut ilinniarnertuunngorniarfiit ilinniakkanut naammassineqarsimasunut ilaatinneqarput.

 

Pineqartut ilinniakkanut naammassisimasanut qaffasinnerpaanut atassuserneqarput, aammalu ilinniarnertuunngorniarfinnut, inuussutissarsiornermi ilinniarfinnut, ingerlariaqqiffiusumik ilinniarfinnut ilinniagaqarsimanngitsunulluunniit agguataarneqarlutik. Ilinniartitaanermut Naalakkersuisoqarfimmik isumaqatigiissuteqarneq malillugu qaffassarluni pikkorissarnerit ilinniakkatut qaffasinnerpaatut naammassineqarsimasut ilinniarnertuunngorniarfiit ataannut inissinneqarput. Qaffassarluni pikkorissarnerit ISCED2011-ni qaffasissuseq 4-rimi inissisimapput, tigusaanissamullu piumasaqaataavoq ilinniarnertuunngorniarfimmik naammassinnissimanissaq.

 

Naatsorsueqqissaartarfiup ilinniakkanut qaffasinnerpaanut nalunaarsuisarfia Kalaallit Nunaanni najugaqartunik taamaallaat imaqarpoq. Taamaattumik misissukkat qaffasinnerpaamik ilinniagarisimasaannut Naatsorsueqqissaartarfiup inunnik nalunaarsuisarfiani piffissami pineqartumi qaninnermi nalunaarsugaasimanerit atorneqarput. Kalaallit Nunaatalu avataani piffissami sivisuumi ilinniakkamik ingerlataqarsimasut kisitsisitigut paasissutissani matumani saqqummiunneqartunit ilinniagaat qaffasinnerusinnaapput.

 

Nalunaarsuutinit siullernit allannguutit

Nalunaarsuutinit siullernit periaatsip allannguuteqalaarnikuunera uuttuutit nalunaarsuutaanut tamanut sunniuteqarpoq.

 

Ilinniagaqarnersiuteqartitsiviup nalunaarsuisarfia nalunaarsuisarfiuvoq ataavartumik, aammattaaq ukiumi siuliini naqiteriikkanik , naqqiinernik ingerlatsiviusoq. Kisitsisitigut paasissutissani matumani nalunaarsuutit najoqqutarineqartut allanngorput, Naatsorsueqqissaartarfiup saqqummersitaanut kingullernut ilinniakkanut qaffasinnerpaanut naammassineqarsimasunut ingerlanneqartunullu najoqqutarineqartut paasissutissat assigiit atuutsinneqalerlutik. Kisitsisitigullu pasissutissat saqqummersitat pingasut uani pineqartut tassaapput 2015-imi ilinniarnertuunngorniarnerit aamma inuussutissarsiutinik ilinniarfiit, 2015-imi ingerlariaqqiffiusumik ilinniaqqinnerit aammalu 2015-imi innuttaasut ilinniarsimassusaat.

 

2014-imi nalunaarsuutini paasissutissat najukkanut tunngasut annikitsumik kukkunernik imaqarput, tassani inuusuttut ataasiakkaat najugaqavissuunngitsut ukiumi kisitsiviusumi paasissutissat atornagit ukiuni tulliuttuni qaninnerni najugaannut paasissutissat atorneqarsimammata. Kukkuneq naqqinneqarpoq.

 

Naggasiullugu ukiup inuusuttut 12-inik ukioqalerfiisa naanerani najugarisimasaannut paasissutissanik Kisitsisaataasivimmi tabelimik ilanngussisoqarpoq. Ukioq kingulleq saqqummersitami Kisitsisaataasivimmi tabeli ilaanngilaq.